كثير مننا وهو جالس علي الكمبيوتر يلاحظ بحدوث تهنيج له فجأه وفي اوقات غريبه
عندما تقوم بتشغيل احدي الالعاب مثلا تجد الجهاز يدخل في مرحله سرحان شديده
وبعدها تخرج لك الرساله الشهيره ( لايمكن تنفيذ هذه العمليه )
هل تريد ان تبلغ بالمشكله ؟
وكأنك طلبت عمليه فدائيه
تكرر التجربه فتأتيك نفس النتيجه
تقوم بتشغيل فيلم ما ..
يخرج لك برنامج تشغيل الفيديو لسانه
ويطلب دعم من برنامج كودك
تأخذ نفسك وتركب تاكسي فورا وتذهب لمجلد السي
لتكتشف ان الكودك موجود وانك قمت بتسطيبه من قبل !!
اذن اين المشكله ؟
غالبا تقوم بعمليه ريستارت للجهاز فيسترد عافيته قليلا بعدها ...
تستطيع ان تشغل لعبتك وتشاهد فيلمك ..
بعد قليل تحدث مشكلات اخري ..
رسائل غريبه تظهر ..
الكمبيوتر يقوم بأشياء غريبه وغير معتاده
وقتها تفهم وتقول لنفسك في ثقه
هذا فيروس ما
تقوم بالعمليات المعتاده من تسطيب الانتي فيروس
وتقوم بتحديثه وعمل سكان كامل علي الكمبيوتر
لتجد ان الاصابات بالمئات ..
تقوم بالتضحيه في حزن ورضا في نفس الوقت
انت تعلم ان غالبيه البرامج والالعاب يمكن تعويضها
ربنا يخليلنا انترنت دونلود مانجر ويوتورنت
المشكله بقي عندي اني بحس لما بسمع الاخبار
واشوف الاحداث واللي بيحصل مش بعرف افسر ده الا بتفسير واحد
بلدي فيها فيروس !!
ناس حتقولي ياعم ماحنا عارفين ..
انفلونزا الخنازير والطيور ..
حقولك يبقي انت مفهمتنيش ..
وضع البلد غريب جدا ومش طبيعي
فيه فيروس مبهدل البلد ..
وبرامج الفيروسات المصريه مش شايفاه
ضماير الناس بس شايفاه
طبعا الفيروس ده مؤذي لناس وبينفع ناس تانيه
مثلا
بمشي والاقي الاتوبيسات غرقانه ناس راكبين فوق بعض
افتكر وقتها ان المشهد ده قديم اوي
معقول لسه لحد دلوقتي فيه كده ؟؟؟؟
امشي الاقي ناس بتاكل من الزباله وعايشه في المقابر
في نفس الوقت الاقي اراضي شاسعه في الدوله
مهجوره
الاف الافدنه تجد امامها جمله ملك للدوله
او ملك المرحوم عرفان الوكيل وليست للبيع !!
الاراضي دي كلها عامله زي الهارد الفاضي
لازم طريقه ننقل بيها الناس من الديسكات القديمه اللي اتلغت
اللي هما فيها
اللي هما فيها
ونحطهم في مجلد محترم مساحته محترمه تليق بمصريتهم
هما مش المفروض الكمبيوتر اللي عايشين فيه دافعين فيه زينا ؟
الاقي سواق تاكسي لازم يعرف الاول انت رايح فين قبل متركب
وتقف تستأذنه وتقوله : لو كنت تسمح بس سيادتك تتكرم وتتعطف
وتوصلني للمكان الفلاني
فيبصلك بقرف ويقولك لا وممكن يبص بقرف بس ويمشي
ولو وصلك لمكان قريب لكن منطقه سياحيه
لازم الاجره تبقي مضاعفه !!
كأنه بياخد منك ضريبه سياحه
بذمتك مش سواق التاكسي ده يعتبر ملف متفيرس ؟
ولازم برنامج الفيروسات يعمل الواجب معاه ؟
بشوف مستنقعات الفساد في البلد تنتشر في كل مكان
كأنها ظاهره التصحر اللي يااما درسناها في المدرسه
او زي ملفات غريبه بتظهر في الكمبيوتر عندك وتحاول تمسحها
تلاقيها مش بتتمسح
في كل مكان
كل شخص اصبح فاسد ويأخذ حصته من الفساد
كل واحد في وظيفه بيدور علي اسهل واأمن وسيله يقدر يوفر احتياجاته
بيها
لانه عارف ان المرتب مش مكفي
بعد فتره تلاقي الموظف سواء كان موظف كبير ولا صغير
بيتورط اكتر واكتر في المستنقع ده
كان الاول عاوز ياخد رشوه عشان يجوز البنت
دلوقتي البنت اتجوزت يبقي نجيب عربيه
وبعد مجاب العربيه لازم نشتري ارض ونبني بيت ملك
وبعد مايبنيه
يلاقي طلبات ابنه بتحاصره
عاوز يتجوز وعاوز عربيه
وعاوز يبقي ابن ناس قدام اي حد
من حيث اللبس والكاشاااااات ..
فيغطس ابوه في المستنقع ويقب مطلع معاه الرشوه السهله
اللي بتعمل المعجزات
اللي بسببها بتلاقي في الشوارع دلوقتي عربيات اخر موديل
مهو لازم تبقي حرامي عشان تعيش
احتياج + فساد = حياه كريمه
1+1=1
حتقولي العمليه الحسابيه غلط !!
حقولك ياعم ماهي البلد كلها حاسب الي كبير
بس مهنج زي مقولتلك ..
فمتتوقعش نتايج سليمه ابدا
ماشي في الشارع في سيدي جابر
لقيت خالد سعيد
بيتمسح بيه البلاط في الشارع
ركبت ميكروباص لقيت الناس بتتكلم عن جثه
احمد شعبان
اللي لقوها في الترعه !!
نزلت من الميكروباص قابلني واحد حكالي عن
مصطفي عطيه
اللي قتلوه ركلا بالاحذيه في الشارع
نزلت من الميكروباص قابلني واحد حكالي عن
مصطفي عطيه
اللي قتلوه ركلا بالاحذيه في الشارع
رجعت البيت وفتحت التليفزيون لقيت خبر قتل
سيد بلال
الوضع كده مش طبيعي
الملفات دي مهمه جدا في الويندوز وخسارتنا ليها خساره كبيره
معلش بخلط دايما بين الكمبيوتر وبين مصر دلوقتي
الناس دي خسارتها كبيره ومعني اللي حصل ان
الفيروس
الفيروس
بدأ مرحله التدمير الذاتي نفسها
لما يدمر ملفات الجهاز اللي هو عليه
فكده بيهدد وجوده نفسه كفيروس
طيب الحل ايه ؟
برنامج الفيروسات شكله باظ والفيروس قضي عليه
طيب ازاي حنقضي علي الفيروس ؟
الوضع صعب جدا فعلا
ملفات كتير بتقاوم الفيروس في البلد بس منضمنش
غدر الفيروس
واحنا اولادنا اغلي من اي فيروس واغلي من البلد نفسها
لان ولادنا هما مصر نفسها
ملفات كتير يأست وحرقت نفسها
ملفات كتير اتعملها ديليت في الخفاء واحنا مش حاسين بيها
لازم فورمات بسرعه
لازم فورمات بسرعه
بس انا عارف
كل مره نحاول نعمل فورمات للبلد
يعمل الفيروس ريستارت في اخر لحظه
ونفتح الكمبيوتر وننسي كل اللي فات ونبص تحت رجلينا
..
بعتذر للي مفهمش كلامي في الموضوع عن طريقتي واسلوبي ده
مش حيفهمني الا نوعيه معينه من الناس
واللي مفهمش ياريت يعتبرني
واحد فاضي كان بيهزر شويه ويستخف دمه
الفيروس
اكيد كلكم عرفتوه
فبلاش اقول اسمه !!
ليست هناك تعليقات:
إرسال تعليق