دفتر الزوار

الجمعة، 29 مايو 2015

برامج وادوات مونتاج واخراج و مؤثرات بصريه
 وخدع سينمائية جاهزة لأفلامك واعلاناتك وصورك ..


ستجدها علي منتديات نتاوي هنا 


الأربعاء، 16 مارس 2011

لو انت عريس جديد تعالا وانا اقولك تعمل ايه

اوعي دماغك تكون راحت هنا ولا هنا

اديني بقولك اهو !!


الموضوع ياسيدي كالأتي :



بخيت اتجوز بخيته

والحمد لله

والباشا بخيت حس انه هرقليز

بعد اول اسبوع



وانه مقطع السمكه وخياشيمها !!

راح الباشا مستلف الكاميرا بتاعه اخوه


وحطها في حجره نومه

قال ايه عشان يشوف نفسه !!

وبعدها نزل الفيديو علي الكمبيوتر بتاعه !!

بخيت عطي اخوه الكاميرا بعد

مامسح الفيديو وقلبه اطمئن


المشكله ان اخوه عطي الكاميرا للواد

بسطاويسي


بسطاويسي عيل عوقر ..




نزل برنامج استرجاع المحذوفات !!

وعمل تشيك علي الكاميرا ورجع الفيديو

المهم ابن عم بسطاويسي بياخد حاجات منه في مره

راح اخد الفيديو وسط الداتا بالغلط !!



قعد الفيديو يتنقل من هنا لهنا ..

في نفس الوقت كان بخيت نفسه بيلعب جيمز



راح الويندوز سقط

فأخد الكمبيوتر لبنهاوي صاحب سايبر



وسابهوله يومين يصلحه

بنهاوي لقي الفيديو فنسخ لنفسه نسخه

والفيديو قعد يتنقل عن طريق بنهاوي وعن

طريق بسطاويسي لمده 3 اسابيع

وصل بعدها

لـ بكري



المهم بكري كان عيل قليل الادب شويه

وكان مشترك في موقع عربي من اياهــــم




بكري رفع الفيديو علي سيرفرات

وعمله موضوع في الموقع ايـــــــــاه

وتم تحميل الملف 7825521 مره

في نفس الوقت موقع من ايـــــــــاهم

منافس اخد الفيديو وعملوله موضوع

ونسبه التحميل 2542652

فجأه وجد بخيت وبخيته ان

مصر



كلها شافت !!

وانهم

اصبحوا من نجوم

مصر

ولهم جمهور عريض من المشجعين !!



ارجوك يا عزيزي

العريس الجديد

اوعي تغلط الغلطه دي ابدا

ولو علي سبيل الهزار والضحك

لا بموبيل ولا كاميرا

فيه ذئاب بتستني





حد يغلط الغلطه

دي

ومتبقاش واثق في نفسك اوي

لان الاف الفيديوهات اللي منتشره

حتلاقي فيها

ناس كلها ثقه
!!



لكل مقبل علي الزواج .. تعالا شوف الحياه ماشيه ازاي

الكلام التالي يعبر عن شاب مصري عادي .. وليس عني بالطبع :


انا متزوج ولدي طفل صغير


اول الشهر ..

والواحد لسه قابض اهو المرتب ..

اول شئ ادفع الكهرباء 50 جنيه

الميه 30 جنيه

ايجار الشقة 250 جنيه

نيجي بقي علي متطلبات البيت من طعام ..

خزين للمطبخ بدون اي لحوم او طيور او اسماك يتكلف 400 جنيه

طيور لحوم اسماك 300 جنيه

مواصلات عاديه لزياره الاهل والاقارب 30 جنيه شهريا

شراء فاكهه ب 60 جنيه شهريا

بقاله عاديه للعشاء 100 جنيه تقريبا

الذهاب للدكتور مرتين حسب الظروف 100 جنيه

ادخار مبلغ 500 جنيه شهريا .. ليكون لدي مبلغ امان امام اي ظرف طارئ

الاجمالي حتي الان

1820 جنيه

هذه متطلبات اساسيه

هناك ايضا عيد ميلاد ابني مثلا وملابس له ولامه ولي في الاعياد

تكاليف دخول المدارس من مصاريف وملابس وكتب وكراسات واقلام وشنط

فعندها يجب ان يكون مرتبي 3000 جنيه كحد اقصي ..


قولنا ان اجمالي متطلباتي 1820 جنيه

مع العلم ان مرتبي ويعتبر مرتب محترم بالنسبه لكثيرين هو

650 جنيه

اذن اين باقي المبلغ وهو1170 ؟؟؟؟؟؟؟؟؟؟

من اين احصل عليه لأعيش حياه كريمه ؟؟؟؟؟؟

بماذا اضحي من متطلباتي ؟؟

اضحي باللحوم والطيور والاسماك ؟

ام اضحي بالبقاله ؟






ام اضحي بزياره اقاربي والفاكهه والكهرباء ؟؟؟؟؟؟؟؟؟؟؟؟


هناك ملايين من الشباب الان لا يملكون ال 650 جنيه شهريا هذه

عاطلون في بيوتهم وعلي القهاوي .


كيف سيتزوجوا ؟

كيف سيشتروا شقه ب 80 الف جنيه ؟؟

او تأجير وخلو رجل ب 35 الف ؟؟

والموبيليا والاجهزه والتشطيب ؟؟



والذهب كيف سيشتروه ؟؟؟؟؟؟



وهو وصل للحظه كتابه هذه السطور ل 204 جنيه للجرام ؟؟؟؟

من هم سائقي السيارات الرهيبه في الشوارع الان ؟؟؟


هل هم مليونيرات مصر ؟؟

هناك جيران كثيرين لي لديهم عربيات فارهه ...

ولم اسمع يوم انهم مليونيرات ..

فمن اين اتت هذه الاموال الضخمه ؟


والعدد الرهيب من السيارات الباهظه الثمن


التي لو نظرت داخلها لوجدت شابا يبدوا عليه علامات الفقر من الصغر

او رجل في الاربعين يلبس سلسله جنزير حول رقبته

او فتاه شابه نحيله كعصاه المكنسه تلبس نظاره ..

او منتقبه ..


من اشتري لها السياره ذات ال 100 الف جنيه ؟؟

هل مواصلاتها شديده وكثيره لهذه الدرجه الخطيره ؟

من اين حصل هؤلاء الناس علي هذه الاموال .؟؟


هل حسبوها ووجدوا ان هذه المرتبات لن تجعلهم يعيشوا فضلا

ان يوفروا حياه طيبه لاسرتهم ..

هل حسبوها ووجدوا ان الفساد هو اقرب الطرق حاليا للنجاح ؟؟

وانه اصبح لغه العصر .. والطريق الممهد ؟؟

اننا نعيش في مأساه تزداد كل يوم

وليس لنا نجاه منها غير التقرب من الله والالتزام بالدين

نرجوا من الله ان يرحمنا ويغفر لنا ذنوبنا واخطائنا

ويرفع مقته وغضبه عنا ..


وتحيا مصر والدول العربيه

__________________
ــــــــــــــــــــــــــ

هل تحب حسني مبارك حقا ؟؟


انقسم الناس في الفتره الاخيره بعد تنحي مبارك لثلاث فرق

الفريق الاول يمتلئ بالفرحه ونشوه النصر .. وبعض الشماته تجاه النظام

الفريق التاني راضي عن رحيل النظام ولكنه لم يكن يريد ان يخرج النظام بهذه الطريقه المذله

الفريق التالت وهم غالبا المنتفعين من النظام او بعض الاشخاص عديمي الشخصيه ..

الذين شعروا انهم بأختلافهم عن الباقيين يجعل هذا منهم اشخاص مميزيين ..

هذا الفريق رأي ان اصلح من يحكم هذه البلد هو

محمد حسني مبارك نفسه

ده طبعا غباء يتحسدوا عليه بكل المقاييس

والايام بتثبت كل يوم ازاي احنا كنا ساذجيين لاقصي حد

وان خيرات البلد دي لا تعد ولا تحصي بدون اي مبالغه

كنا بنقعد ونقرا الاخبار في العهد الماضي ..

ونسمع خبر : قناه السويس تكسر الرقم القياسي الجديد في نسبه العائدات اليوميه

كان الخبر ده متكرر كل اسبوع تقريبا ..

وكان يستفزني ويستفز كل من يقرأه ..

ولو دخلت وقرأت التعليقات ستجد فيها المصريين بيشدوا شعرهم من الغيظ والقهر

اين تذهب هذه الاموال وغيرها وغيرها ؟؟؟

يدخل عليك متذاكي ويقول : بنشتروا بيها سلاح !!

افتكرت الجمله دي يوم منزل الجيش لتأمين البلاد بعد انسحاب الجيش

اول مشهد شاهدته هو مجموعه جنود عند احد كباري القاهره وهو بيدفعوا عربيه الجيش

YouTube Video

ERROR: If you can see this, then YouTube is down or you don't have Flash
installed.


العطلانه

عرفت وقتها فعلا ان المليارات اللي بتتدفع في السلاح مراحتش هدر

تسمحلي اخدك في جوله صغيره عزيزي القارئ ؟

انا عارف انك مازال بك بعض الاحترام تجاه رئيسك السابق

تعالا معايا في الجوله دي :::::

حنخبط علي الباب اللي قدامنا ده

فتحت الباب شابه عمرها 25 سنه ..

نحيفه بادي عليها الفقر بشده

: لو سمحتي الحاجه موجوده ؟

حتقولنا اتفضلوا الحاجه جوه قاعده علي الكنبه

حندخل نلاقي امرأه عجوز ضريره ..



المرض نخر كل عظامها ..

بعد التحيه والاطمئنان علي صحتها المتدهوره سألناها عن عائل الاسره اين هو ؟

ستجدها تخبرك انه معتقل ظلم ..

ستخبرك انه مات علي ايدي الشرطه

ستخبرك انه كان فقير جدا ومقدرش يستفيد من تنميه مبارك

فراح اتبرع بكليته ومات بعد متبرع بيها بشهر وساب امه ومراته لمستقبلهم المظلم

حتقولك انه قاعد علي القهوه بيشتغل ب 20 جنيه في اليوم نصهم بيروح علي المزاج

والنص التاني ياكلوا بيه !!

ستخبرك ان جوزها شغال بقاله 40 سنه في الحكومه وبياخد 500 جنيه في الشهر

سيبك من البيت ده ..

تعالا وشوف الشاب اللي بيتخرج من الكليه ويخلص جيشه ويبدأ يشق حياته

فيلاقي نفسه وهو عنده 21 سنه انه مطالب بتوفير مبلغ 80 الف جنيه علي الاقل

ليتزوج ..

الحد الادني للمرتبات يا عزيزي هو 300 جنيه

القضاء قال انه 1200 جنيه بس احنا حكومه بلطجيه عنجهيه فاسده

انتم عارفين كده كويس

حنمشيها 400 جنيه مشوا حالكم بيهم

ليييييييييييييييييييييه مالقضاء قال 1200 .. انتم بتنفذوا حسب مزاجكم يا حكومه ؟

لا يا خويا عشان ميحصلش تضخم ..!!

ازااااااااااااااي .. حيحصل تضخم عشان احنا بناخد مرتب يعيشنا بني ادمين عاديين

امال انتم ياللي بتاخدوا الملاييين مش بيحصل بسببكم تضخم ليه ؟

ولا التضخم بتاعكم في الكرش والارداف بس ؟

لسه بتحب مبارك ؟

طيب تعالا معايا ندخل المدرسه اللي هناك دي

واتفرج علي حصه الدين لو كانوا بيعترفوا بيها اساسا !!

ازيك يا حبيبي اسمك ايه ؟..

اسمي وائل يا عمو

ذاكرت دين يا حبيبي ؟؟

دين ايه يا عموووو ده مش علي المجموووووووع

ولو فتحنا كتاب الدين حتلاقي حاجات متفصله تفصيل

تعالا نخرج الشارع ..

حاسب علي نفسك من البلاعات والحفر والمجاري

اعرف شارع في الاسكندريه عندنا بيتسفلت كل شهر تقريبا

لان المسؤولين بيعبروه يوميا ..

تعالا نشوف الجرايد ..

كلام غريب وغير منطقي عن الديمقراطيه والتنميه

والارتقاء بمستوي معيشه الافراد والمجتمعات

ونفس الكلام كان بيتقال في الخطب بتاعته اللي كنت بشك انه فاهم

هو بيقول فيها ايه !!

خطب دايما مستفزه واستمرت في استفزايتها لاخر لحظه في حكمه

لو دخلنا مستشفي حتلاقي فيها امراض العصر كلها ..

واغلبها بسبب التلوث وسوء التغذيه والاهمال في التوعيه

دايما يخرج علينا ويقولنا اننا نواجه تحديات !!

30 سنه تحديات لحد مستوينا وطلع بيتحدانا احنا !!


الريس بتاعنا طلع بياخد رشاوي وبيخنصر مبالغ رهيبه من اول سنوات حكمه

وهكذا انتشر الفساد لان الحاكم نفسه افسد من شعبه

وعندما احسسنا بأن نهايته اقتربت بحكم السن الطاعن

خرج علينا بهديه حلوه بمثابه المفاجأه ..

حيسبلنا جمال ابنه المفضل !!

عشان يحكمنا ويستمر كأمتداد لمبارك ..

وعشان يغطي علي فضائح والده

وزور كل شئ ..

انتخابات شعب وشوري فاسده مزوره

لوحات في كل مكان بصوره جمال

تنصيب ابنه امين عام السياسات


تهيئه كل الامور واغلاق كل الافواه

ولكنهم يمكرون ويمكر الله

والله خير الماكريين

الشرطه قتلت خالد سعيد

وغيره وغيره وغيره

وانتهت بسيد ابو بلال

الذي قامت الثوره بعد شهادته بأيام

واصبح مبارك في موقف لا يحسد عليه

وفي خلال 18 يوم انتهت اسطوره الدوله البوليسيه

وانتهي تاريخ مبارك نفسه وتكلل بأكاليل العار

وتم شطب اسمه من كل مكان وحرق صوره

وانكشفت كل يوم الاعيبه وخدعه لشعبه

ماذا كان يريد من الدنيا بعد كل هذا ؟؟؟؟؟

كان يعيش سلطان وشعبه اغلبه جعان

القليل فقط كان يعيش حياه كريمه

ومن يقبل السرقه والفساد يحصل علي نصيبه

والغالبيه الباقيه لا تجد اي شئ

لو كنت تحب مبارك فعلا وتريد بقائه ..

فأنت تستحق ان يسلط الله عليك في حياتك من هو علي شاكلته بأذن الله

حصريا .. للمصريين

حصريا للمصريين فقط !!



حاجات كتير في حياتنا بنشوفها يوميا ..

ومنعرفش اننا عندنا الحقوق الحصريه ليها ..

بمعني انها مش موجوده في اي مكان تاني غير عندنا ..

مثلا ..

فين بتلاقي بتاع الانابيب وهو بيرمي الانابيب من العربيه وهي مليانه




فوق بعض .. بكل جرأه ... وبلا خوف ؟؟

والافظع ان وسيلته للدعايه لنفسه .. هي الخبط بمفتاح حديدي عليها ..

وهي ممتلئه بالغاز السام القابل للانفجار !!

حصريا للمصريين فقط !!

لما تيجي تشرب كوبايه لبن في الارياف ..

حتحس انه لبن غريب ..

وتقولهم ده مغشوش ولا ايه ...؟؟

اللبن طعمه مش كده ابدا !!

حيقولولك بسخريه انه لسه جاي من البقره طازه !!



وحتعرف بعدين انك طول عمرك بتشرب

لبن .. اما عباره عن كوكتيل لبن مواشي

ماعز علي جاموسي علي بقري فوق بعض

او مزود بالماء والنشاء والفورماليين والطباشير

والزلال و الصمغ والجيلاتين والغراء !!



واشرب يا معلم وادعيلي !!

وده ايه يا اخونا !!

حصريا.. للمصريين فقط !!


لما يبقي اليوم اللي حتجيب فيه عيش

يوم الملحمه الكبري



وتلاقي نفسك بتلبس ملابس قديمه خوفا من التمزيق

ومعاك سكينه المطبخ لزوم الحرص ..

وتقف في طابور طويل جدا ..



وكل شويه تلاقي واحد مجرم او مسجل خطر

يدخل ايده من غير ميقف في الطابور وياخد اللي عاوزه ويمشي

ومحدش يفتح بقه !!

وتلاقي واحد عجوز يحاول يمد ايده زيه ..

والناس تضربه وتشتمه لحد ميقع قتيل في الارض ...

ولما ترجع بيتكم من غير عيش ..

وهدومك متقطعه برضو ..

يبقي لازم تعرف ان ده ..

حصريا .. للمصريين فقط !!


لما تروح اي دائره حكوميه ..

عاوز تخلص ورقك ؟؟ هات قهوتي



لما تخش سينما .. حندخلوك عافيه لمكانك وهات قهوتي

لما تدخل مطعم او قهوه .. وتتلطع مستني طلبك ..

وفي الاخر يقولك هات قهوتي .. !!

يبقي ياسيدي ده كله طبعا ..

حصريا .. للمصريين فقط !!

لما ربنا يحن عليك بعربيه ..

وتروح اي مكان ..

حتلاقي دايما فيه بلطجي ..

عامل نفسه سايس علي الرصيف اللي حتركن فيه


بيظهر من العدم .. ويقولك ارجع بظهرك يا استاذ ..

حتي لو كنت راكن عشان تشتري حاجه

من المحل المواجه وراجع علي طول

مفيش رصيف في مصر كلها بدون سايس !!

وده بس يا جماعه ..

حصريا .. للمصريين فقط !!

لما تشتري دقيق عشان الاكل ..



وتلاقي الدقيق فيه ديدان ..

وتلاقي الناس كلها بتشتكي ..

البلد كلها ياناس بتشتكي ..



ويطلع علينا مسؤول ..

ويقولنا ..

الديدان دي ملهاش ضرر علي صحه الانسان .. !!

حتعرف وقتها .. ان الديدان دي ..

حصريا .. للمصريين فقط !!


لما تيجي البلديه وتحفر في شارعك

وتترك الحفر زي ماهي فجأه..



وياخدوا بعضهم ويمشوا

وتقعد الحفر في الشارع شهور وشهور ..

والاطفال تقع فيها .. وتخرج منها ريحه المجاري ..

لما تشم الريحه دي وانت بتقع في الحفره حتعرف ان ده ..

حصريا .. للمصريين فقط ..!!

لما تلاقي نفسك طالب في ابتدائي واعدادي ..

والمدرسين في مدرستك بيسبوا الطلبه بالام والاب !!

لما تلاقي نفسك بتتمد في الطابور بسبب انك هرشت خدك وانت واقف



لما تلاقي المدرس بيقرفك في المدرسه ويكرهك فيها عشان تاخد درس

ولما تكبر وتروح كليه تلاقي الاستاذ بتاع الماده بيتعامل معاك انت وزمايلك

زي البلطجي وقاطع الطريق . .

وعشان اتأخرت مره يخليك تعيد السنه مره واتنين ..

واللي ميشتريش كتابه ينقل نفسه جامعه الارياف احسنله ..

ولو نسيت وسيبت الموبيل مفتوح غلط ورن ..

وقالك هات الكارنيه بتاعك ..



وقتها حتعرف ان ده ..

حصريا .. للمصريين فقط !!

لما تخرج وتشتغل في مكان ..

وتلاقي مديرك بياخد كل حقوقه الوظيفيه ..

وبيحرمك من كل حقوقك وكأنك أله معدنيه ..



ياخد اجازته ويستمتع بيها ..

ويحرمك انت منها ..

لما ينقلك من مكان لمكان ..

ويخلي ايامك وحياتك كلها حجيم

ويمارس عليك امراضه النفسيه ..

ولا يخاف الله فيك ابدا ..

وتدعي عليه ليل ونهار

وانت قاعد بتدعي حتفتكر ان ده

حصريا .. للمصريين فقط

لما تلاقي واحد جاي من الارياف .. فلاح او صعيدي



وتلاقيه عمال ينش شمال ويمين النصابيين اللي اتلموا عليه

وتلاقيه اخر اليوم رغم كل التحذيرات ..

واقف في القسم بيبكي وعامل محضر نصب ..

وتروح تطبطب عليه وتقوله :

حصريا .. للمصريين فقط !!

لما تبقي ماشي في الشارع وتلاقي كمين شرطه



فترتعش كأنك لقيت قطاع طرق ..

لما تلاقي ظابط بيكلمك ..

فتلاقي لسانك رجع 70 سنه لورا ..

وتلاقي البشويه والبهويه رجعت ..

وتلاقي نفسك وانت شخص محترم

او شيخ فاضل ...

تأخذ اول قـــفا في حياتك !!



ويتم سحلك وضربك بدون اي سبب قانوني ..

حتلاقي وقتها يافطه واحد ماسكها مكتوب عليها ..

حصريا .. للمصريين فقط !!

لما يبقي كل اسره فيها واحد او اتنين فيهم مرض خطير

وتلاقي نفسك وانت شاب عامل عمليه تغير شئ في جسمك

وتلاقي المرضي في التأمين الصحي قاعدين علي السلالم



والممرضات بيسبوا المرضي ويعتدوا عليهم ..

ولما تشتكي للمدير ينط فوقك ويتعارك معاك هو كمان!!

وقتها وحقنه البنج بتخش عضلك حتقول :

حصريا .. للمصريين فقط !!


لما تلاقي تعليم بلا دين ..

ومناهج اتفه من العجين ..

واطفال بتسب الدين ..

وشباب مشروع مجرمين ..

واطفال عبط ومجانين ..

ومنتجات كلها من الصين ..

ومرتبات تخلي العيشه طين ..

وفاكهه وطماطم بملايين ..

وبنات علي حل شعرهم سرحانين ..

وانتخابات بيحميها المزوريين ..

وحوادث متعرفش منين ولا منين ..

وشاب علي كل ناصيه

يعرض عليك بضاعته فاكرك من الحشاشين ..

وتلاقي النيل حيتقفل من ناحيه الاثيوبيين ..

وبرامج 0900 كلها نصب وقمار .. بتمص دم المغفليين ..

وقتها بس حتعرف وتقول بأعلي صوتك ..

حصريا .. للمصريين !!






شاهد المرفقات

█▒░ تعالــوا نتكلــم شـويـه عن الــطـــــــوب ! ! █▒░

اولا انا مش خبير طوب
!!


ثانيا انا مش عارف بكتب ليه عن الطوب اصلا !!

بس ملاحظه لاحظتها في مشاهدتي للافلام الاجنبيه


لاحظت ان مبانيهم الاثريه اغلبها شديد البنيان

يتحدي القرون والاعوام .
.


ولأننا لدينا اشهر واعظم مبني حجري تحدي عوامل الزمن

وهو الهرم

فانني اقول ان القوه والتحمل تكمن الهندسه السليمه

و حجم وقوه الحجر نفسه

او الطوبه بمعني اصح


شاهد طوبنا الحالي


وطوب حبايبنا في الدول الاخري






الطوبه الخاصه بنا تشعر كانها

تتفتت وانت تمسكها في يدك

اما طوبتهم تشعر معها بالرهبه


هناك طوب اسمنتي


ولكنه كما تري عباره عن خرزات من الاسمنت

يمكنك ان تقوم بخرقها بأصبع يدك

ولا تستطيع معها دق مسامير في الحائط

لانه سيفتح لك نفق وليس فتحه صغيره

انما الطوب الاصلي هناك ياعم


مش عشانا احنا

طوبنا بيتعمل في الشارع

ورش تحت بئر سلم




وطوبهم في اماكن خاصه


وطبعا وسيله نقلها لدينا عمليه جدا


ورغم انها هي التي نعيش في جوفها ..


فلا نعطيها الاهميه التي تستحقها ..

ونقوم بالاسترخاص .. بشراء الاقل سعرا

واقل جوده طبعا ..



وبالتالي وجد الصناع ان الطلب علي المنتج الردئ هو الاكثر

فـانتشر الردئ وشمل غالبيه المباني





هناك يمكنهم ان يصنعوا من الطوب الاحمر اشكال وديكورات جميله










ليس الغرب افضل منا

ولكننا اخترنا التقليد فقط

رغم ان بلادنا هي اشهر بلاد البنائين

في التاريخ

مش عارف ايه اللي خلاني اتكلم عن الطوب !!

كنت عاوز اقولكم ان فيه جزء من منزل وقع انهارده

واخد معاه عده ارواح

وده طبعا خبر متكرر بنسمعه كل اسبوع تقريبا









مش عارف ايه دخل الكلام ده بالكلام عن الطوب

؟؟؟؟؟؟

الموضوع ده غريب ومش عارف كتبته ليه !!

ولازم اعمله ديليت حالااااااااااا

__________________
ــــــــــــــــــــــــــ
ــــــــــ