مقارنه بين مصري وامريكي !!

ساعدتنا الفضائيات والانترنت علي ان نشاهد كيف يسير العالم من حولنا

وشعرت انني اريد ان اعمل مقارنه صغيره متواضعه

بمعني انها ليست شامله

والمقارنه بين شاب مصري اسمه خميس وشاب اسمه جيمس

الاتنين من اسر متوسطه

خميس مصري .. وجيمس امريكي

نبدأ :

جيمس :






لدينا بيت من دورين في منطقه مميزه .. ولدينا سياره ممتازه اخر موديل .. نظام التقسيط من البنوك سهل





وهامش الربح ضعيف عندنا ..


خميس :





اتولدت في شقه ايجار قديم .. في حي شعبي .. ابويا حاول يملكها بس المالك كان عاوز يطردنا بأي طريقه .. وبيحلم باليوم ده ..




ابويا عنده اتوبيس .. بس بتاع الحكومه طبعا !!



شغال عليه سواق ..

فكر ياخد قرض من البنك عشان ننقلوا في بيت تاني

بس البنوك عندنا هامش الربح عندهم فلكي ..




جيمس :

اسلوب حياتنا طبيعي وعادي ولا يفرق عن الاغنياء بكثير .. يجب اسبوعيا ان نذهب للنادي يوما كاملا ..



نذهب للمصيف كل سنه

لمده اسبوعين علي الاقل ..


لدينا كمبيوتر واحدث اجهزه الترفيه في المنزل ..


خميس :

اسلوب حياتنا طبيعي .. نذهب اسبوعيا لصلاه الجمعه .. ونسمع الخطبه وندعي مع الشيخ علي مافعله فينا السفهاء منا ..




نذهب للبحر يوم او يومان سنويا ..



نرجع من البحر اشبه بالزنوج .. لدينا في المنزل الاجهزه الضروريه في الحياه .. بالتقسيط !!


جيمس ::

ابي يعمل 8 ساعات .. الاحد والاتنين اجازه اسبوعيه .. مرتب ابي 5 الاف دولار شهريا .. وهو مرتب ضعيف جدا .. سمعت ان ابي

هددهم في العمل انهم لو لم يرفعوا اجره سيستقيل ويحرمهم منه ..




خميس :

ابويا يعمل 12 ساعه يوميا .. الجمعه اجازه .. يذهب فيه للعمل اضافي لكي يوفر مبلغ لتكاليف شوار اختي عفاف ..

ابويا بياخد مرتب 850 جنيه شهريا .. ومتسألنيش احنا عايشين

ازاي !! مين قالك اننا عايشين ؟ انت بتسأل اسئله غريبه !!




ابويا حاول يزود اجره هددوه بفصله او اخراجه معاش مبكر !!


جيمس :

بفكر ابقي رجل اعمال .. اول مشعر اني اقدر اعتمد علي نفسي حأجر شقه في نيو جيرسي .. واعيش هناك واعمل مشاريع

خاصه بيا ..





بابا للاسف مش حقدر اشتغل زييه في شركات البترول .. لاني مش بهواها ولانها مش بتعمل مليونير

خميس :

بفكر اطلع كمساري !! ..



لو ملحتقش اشتغل وابويا في القطاع العام يبقي مش حشتغل في حياتي ابدا ..

وربنا لو سهل حأجر شقه في منطقه شعبيه رخيصه شويه واتجوز

واكمل نص ديني ..

لا مش حفكر في البترول طبعا



مين معاه مبلغ زي اللي بيطلبوه .. دول بيبيعوا وظائف مش بيبيعوا

بترول !!


جيمس :

تعرفوا انا بفكر في فكره جميله لتمضيه الاجازه الدراسيه اللي

جايه .. بفكر اني اروح اسافر فرنسا وايطاليا !!



ايوه الشركات السياحيه عندنا عاملين عرض مدهش .. بالنسبه للطلبه ..

اسبوع سياحه كامل في البلدين بسعر ممكن اوفره من مصروفي ..



ممكن ابقي اخلي بابا يديني مصاريفي هناك

هو مش حيأخر عليا حاجه طبعا ..


خميس :

تعرفوا اا بفكر في فكره جميله وجامده .. بفكر اسافر ليبيا واحاول

اجرب حظي مع الشباب اللي بيروحوا ايطاليا


عن طريق البحر ..




بيقولوا انها قريبه جدا من ليبيا مسافه صغيره .. وان

الناس اللي بتغرق دي اشاعات

لتخويف الشباب وقطع الرزق الوفير عليهم .. . ايه رأيكم .. لو قولت

لابويا حيوافق ؟؟


جيمس :

اللي بيعجبني في بلدي اني ممكن امشي ماسك يافطه بهزق فيا

رئيس بلدي ومحدش يقدر يقولي تلت التلاته كام




وان اي موظف حكومي مبيقدرش يرفع رأسه في وشي وانا بكلمه ..

ايوه مانا بدفع مرتباتهم بالضرائب اللي بابا بيدفعها ..

لو حد بس نطق بكلمه اخد منه غرامه وتبقي قضيه الناس تتكلم

عنها .. عشان كده محدش يجرؤ


خميس :

روحت بأبويا التأمين الصحي .. كان مريض شويه .. سابونا 4 ساعات

قاعدين بدون اي اهتمام ..





وعندما تكلمت مع الممرضه قالتلي استني دورك يا خويا .. احنا مش

ناقصينكم ..

قعدت ازعق واقول فين المدير بتاع المكان

واحد من المرضي قالي :


يابني اهدي متوديش نفسك في داهيه .. المدير عارف كل حاجه وهو اللي منظم المكان

لو سمعك بتشتم حتروح وراء الشمس .. انت عارف اللي يغلط في اي



مسؤل في بلدك بيروح فين



جيمس :

انا حاخد مبلغ بدل بطاله لفتره بعد تخرجي .. بس الشغل اكيد حيجيلي بسرعه .. عندنا الكل بيشتغل .. بلدنا دي كانت

ولا حاجه من سنين .. وكر عصابه اللفظ المناسب لبلدي ..



اما الان

فهي تحكم العالم .. وانا سعيد جدا بهذا


خميس :

انا مش لاقي شغل ولازم اتجوز حنان خلال شهرين ومعملتش حاجه في الشقه !!

ابوها بيتلككلي وممكن يفسخ الخطوبه .. انا مقدرش اعيش من غيرها فعلا .. حموت نفسي لو حصل كده

ومدام موت بموت .. يبقي حروح اشوف موضوع بيع الكلي

ده ..



انا فصيلتي نادره .. وكليتي تساوي كتير

انا بلدي باعتني رخيص .. فليه مبعش نفسي بنفسي ؟؟

انا بلدي كانت بتحكم قديما العالم .. دلوقتي حكمت عليا بالموت !!

وانا حزين جدا بكده



.....................



انتهت المقارنه البسيطه .. كنت ممكن اطولها اكتر من كده


بس اظن ان كده كفايه جدا لفهم الفكره


مع الملاحظه انني راعيت عدم ذكر الفرق في الدين .. او الاخلاق

لان هذا ليس المجال لذكرهم ..

احذر سب اصدقائك بالام والاب

كتبها :احمد عبدالحي ॥ في اغسطس 2010


ظاهره رهيبه انتشرت وتوغلت في المجتمع المصري هذه الايام

كانت في الماضي مقتصره علي رعاع القوم ..

ولكنها انتقلت فجأه الي الشباب الذي يفترض انهم (اولاد ناس )

عندما تجد شاب يجلس يتكلم مع صديقه العزيز علي الانترنت

فيقول له مثلا :

- بتعمل ايه يابن الــمـ ......... علي النت مش اتفقنا تنزلي دلوقتي ؟

الصديق الاخر :

- لا يا كــ . ... انا قولتلك مش حنزل انهارده ..

الصديق الاول :

- كـ ...... ........


طبعا الكلام واضح ومفهوم للجميع ..

السؤال هنا .. منذ سنوات قليله كانت هذه الالفاظ كما قلنا تنطبق

علي رعاع القوم ..واطفال الشوارع



الجهله منهم بالتحديد ..وغالبيه مجرمي الشوارع

الان انتقلت الي غالبيه الشباب فلماذا ؟؟

نستطيع ان نقول ان غالبيه شباب هذه الايام _ نقول الغالبيه وليس الكل_ وصلوا لمرحله

من المياعه وزياده افراز هرمونات الانوثه في اجسامهم المفترض انها

اجساد رجال

فكان الحل عندهم هو تغطيه هذه المياعه ومقاومتها بأستخدام الالفاظ

الخشنه

التي سمعوها علي السنه الرعاع .. حتي يقوموا بمعادله الموضوع .. ويدفعوا عن انفسهم

صفه المياعه التي تطاردهم ..





تشاهد عاده هذه الشباب علي النواصي .. يقف دائما مع اصدقائه ويمسك الموبيل في يده

ويرسل بالبلوتوث لصديقه احدث نغمه قام بتنزيلها ..

وتجده يلبس شورط برامودا غالبا ..

ويقوم بتربيه شعره ويغطيه بغطاء الرأس فيجعله يخرج من الجانبيين

مثل نجاح الموجي ..








تجده في الخارج متأنق ومتألق .. ويعيش في حجره يجعلها كالزريبه غالبا



غالبا كل واحد منهم لديه ايميلين .. ايميل عادي بأسمه .. وايميل بأسم

بنت المفترض انها منحرفه



لكي يقوم بأيميله بأيقاع البنات من الفيس بوك .. وعندما يملهن

يقوم بفتح ايميل الانثي ويخدع اصحابه

او اي اشخاص اخريين ويوهمهم انه انثي منحرفه .. وتبدأ كميات من

الالفاظ البذيئه المتبادله

كأنه يتمرن علي الالفاظ بهذه الطريقه او لكي يكتسب الفاظ جديده ..



كيف يجلس شاب مع صديقه ويسب امه وابوه .. ؟؟

كيف يستقبل الاب والام صديق الابن في المنزل ثم يدخل الصديق بكل

خجل وادب وبأبتسامه رقيقه حجره صديقه



ثم يتبادلوا في وسط حديثهم سب امهاتهم وابائهم ؟؟؟؟؟؟؟؟؟؟؟؟؟

لقد حذر الرسول عليه الصلاه والسلام من هذه المشكله ..

وقال :

: " إِنَّ مِنْ أَكْبَرِ الْكَبَائِرِ أَنْ يَسُبَّ الرَّجُلُ أَبَاهُ . قَالُوا : وَكَيْفَ يَسُبُّ أَبَاهُ ؟ قَالَ : " يَسُبُّ أَبَا الرَّجُلِ فَيَسُبُّ أَبَاهُ "


الناس وقتها استغربت وقالت ازاي الراجل يسب اباه ؟؟؟؟؟

فأخبرهم بمنتهي الوضوح .. انه يسب ابو الرجل فيرد عليه الاخر بسب اباه ..


ربما يكون ممن يقرأون الموضوع الان احد الشباب الذيين يسبون

اباء وامهات اصدقائهم في حديثهم العادي




يقرأ بأستهزاء طبعا ..

احب ان اسئله ويجيب بكل امانه ...

انت قرأت الحديث بتاع رسولك الكريم .. اللي اتنبئ بقدومك

فهل ماتفعله هو عناد لدينك ؟؟؟ هل انت من

اشقياء الدنيا والاخره ؟؟




هل تعلم انك لو سببت ابو صديقك او امه ولو مره واحده في حياتك ..

ربما تكون هذه السبه الوحيده هي سبب دخولك لجهنم والعياذ بالله ؟؟






هذه الفعله من اكبر الكبائر .. اي انها كالزني والخمر والقمار ..

هل ترضي ان تفعل اكبر الكبائر في كل مجلس او لقاء مع اصحابك ؟

ارجوك اياك ان تعاند رسولك .. اياك ان تعاند دينك .. اياك ان تتلفظ بأي لفظ

ليس له ضرورة علي الاطلاق ..

قل لصاحبك يا خايب .. يا اهبل .. يا بارد .. يا غلس .. يا ممل ..

خليك محترم ..


بلاش تبقي من الرعاع .. وارفع راسك وبنطلونك لفوق




انا بحكم تعدد اصدقائي اري في بعضهم هذه الخصله السيئه

سب الاباء بالهزار

ولكن لا يجرؤ احدهم علي ان يتلفظ بكلمه واحده ضدي ..


بل واجاهد معهم كي يتخلصوا منها لو استطعت ..

باب التوبه مفتوح .. استغفر ربك علي خطأك ..

انت الان قد عرفت مدي هذه المصيبه



ولو استمررت عليها بعد الان انتظر من الله عقاب قريب

وجاهد اصحابك .. وارتفعوا بنفوسكم لمستوي الاحترام ..

والا ستظلوا طوال حياتكم يسبكم القريب .. والغريب

ابراهيم عيسي ,, ممكن تقولنا ايه هي اللي حمرا ؟

ابراهيم عيسي ..



اشتهر عن طريق صحافه المعارضه

وهو رئيس تحرير جريده الدستور ..

شاهدناه كثيرا يخرج علينا في برامج دينيه علي قناه دريم

يتكلم عن الدين بطريقه كوميديه ..

فهو لا يفقه شئ سوي بعض القرائات ..

التي قرأها في كتاب وجاء لكي يسمعها علي اذاننا ..

واغلبها كما قلنا معلومات بعضها خاطئ .. والسرد بطريقه كوميديه ..

واكاد وانا اشاهده ان اجزم انه لا يفقه شئ هو الاخر مما يقول ..

طالل علينا في ثلاث برامج هذا العام

برنامج حاجه تفطر

برنامج الفاروق اميرا

برنامج حمرا

عارف لما تبقي الامور لبن عسل تمر هندي ؟؟

اهو الباشا عامل كده بالظبط ..

اي برنامج يتم عرضه عليه يقبله مهما كانت فكرته

فلو دعوه لعرض رقصه شرقيه لقبل بكل امتنان !!

برنامج حاجه تفطر عن السياسه ويمكن قبول هذا

برنامج الفاروق اميرا ديني .. حنقول فيه حد ضاحك عليه ومفهمه انه شيخ قدير ونعديها

لكن يخرج علينا من برنامج الفاروق اميرا .. عشان يعملنا حمرا

فلا



قاعدلنا الباشا مع سمير غانم




يقوله ايه رأيك في الستات

والست الصغيره والست الكبيره

ويتكلموا عن مفاتن النساء وقت التراويح

وبعدها ابراهيم عيسي يقوله ايه رأيك بقي في قميص النوم الاحمر

بيعجبك يا سمير ياغانم ..



والمقعده حمرا طبعا وكلام بذئ

وضحك وكركره وهرتعه كأنك فاتح بث مباشر من احد البارات او الغرز

بجد يا ابراهيم يا عيسي انت خليتها سمك لبن تمر هندي

وياريت لو تعرفنا ايه اللي حمرا يا راجل يابن الناس
يا محترم

حان الان موعد مكافأه هيئه الكهرباء عن الخدمه الممتازة طول الشهر

بعد اكثر من شهر من قطع الكهرباء المستمر ..

وجلوسنا وافطارنا في الظلام الدامس ..

وفساد العديد من الطعام بسبب توقف الثلاجات ..

وشراء الشموع

والخضوع لحظر تجوال اجباري بسبب الظلام في الشوارع

والجلوس بالساعات في انتظار عوده الكهرباء

الان تكافئنا الهيئه وترسل لنا الفاتورة !!

وقد راعوا بكل تهذيب وادب مشاعر المواطنين

وضاعفوا القيمه خمس مرات !!

فاجئني المحصل وهو يطلب مني 75 جنيه كهرباء ..

والمشكله مش في ال 75 جنيه

المشكله اني بدفع شهريا 15 جنيه

علما بأني متزوج حديثا ..

ليس عندي تكييف

لا استعمل السخان اطلاقا في هذا الحر

لا اشاهد التلفزيون الا نادرا ..

كل لمباتي موفره ..

الكهرباء تقطع يوميا بمعدل 4 ساعات تقريبا

طيب ازاي بقي المبلغ اتضاعف 5 مرات ؟؟؟؟؟؟؟؟؟؟؟؟؟

سؤال يجب ان يأخذ مكانه وسط عالم الغرائب و ماوراء الطبيعه

فنحن نعيش في دوله الفانتزيا ..